مسار العلوم الإنسانية - جامعة الإمام - تجربة رهف

خطوة التحضيرية

 

بسم الله الرحمن الرحيم

السلام عليكم ورحمة الله وبركته معكم رهف العجمي

طالبة من جامعة الامام محمد بن سعود (مسارانساني)

اليوم بأذن الله بحكي لكم شوية عن بعض الامور في السنة التحضيرية ...

بالنسبة للمسار الانساني التحضيري يتم دراسة ترم واحد فقط

بدايةً المواد:

الانجليزي عليه اربع ساعات وهو اهم المواد في التحضيري

وهو منقسم لقسمين هيدوي ولسينينق

الهيدوي:له كتابة الخاص ويكون اغلبه قواعد وكلمات

وجداً ممتع الانجليزي ومفيد وتكون التيتشر غير عن تيتشر اللسينينق

وبالنسبة لاختباراته اما خيارات او صح وخطأ وبعض الفقرات الكلمة والمقابل لها

اللسينينق:ايضاً له كتابة الخاص وهو عباره عن محادثات وتمارين وكلمات بحيث ان التيتشر تشغل مقطع الصوت والكل يتتبع اما مع المحادثه او يكون يتكلم عن موضوع وانتي تجاوبين على الاسئله من خلال سماعك للمقطع

ونفس اختبار الهيدوي

الحاسب الالي: وهي ثاني ماده برضو مهمه عليها ثلاث ساعات في المعدل

وهو يتكلم عن برمجه وبرامج واشياء زي كذا من الي سبق ودرست بالثانوي

واختباراته متنوعه اما عملي او على الورق

وفي بعض الاحيان تكاليف وبحوث

والمادة الثالثه هي مهارات التعلم: ماده جداً جميله ومفيده في الحياه بحيث انها تتكلم عن تنظيم الوقت وغيره من الاشياء المهمه

وهي من المواد الي تتكلف الطالبه ومجموعتها بعمل عرض وشرحه كامل وعليه درجات مستقله عن المشاركه

وعمل مجلة لجميع الشعبه تتكلم عن نفس المواضيع التي تم تناولها في المادة

اما بالنسبة للاختبار فهو متنوع من ناحية طريقة الاسئله صح وخطأ وعددي وفراغات

بالنسبة لعدد ساعات المادة في المعدل فهي ساعة واحدة

المادة الرابعة مهارات اللغة العربية:

هي مادة جامعة لدروس النحو ودروس الاملاء بوجه عام

وهي ايضاً من المواد التي تكلف الطالبة ومجموعتها بعمل عرض وشرحه كامل

وايضاً يطلب من كل مجموعة عمل بحث لموضوع من مواضيع اللغة العربية

بالنسبة لعدد ساعات المادة في المعدل فهي ساعة واحدة

 

المادة الخامسة

وهي مادة مهارات الاتصال

مادة جداً جميلة بحيث انها تتكلم عن كيفية الثقه بالنفس وكيفية التواصل مع الغير وغيرها من المواضيع المهمة

وهي ايضاً من المواد التي تكلف الطالبة ومجموعتها بعمل عرض وشرحة

بالنسبة لعدد ساعات المادة في المعدل فهي ساعة واحدة

 

المادة السادسة

الثقافة الصحية

وهي مادة جداً سهله تتكلم عن الامراض وكيفية الحماية منها

والاسعافات الاولية بشكل عام والمواضيع الصحية جميعها

في هذه الماده لم يتم طلب شرح من المجموعات

ولكن يتم عمل بحث من المجموعه كامله

بالنسبة لعدد ساعات المادة في المعدل فهي ساعة واحدة

 

 

تم الانتهاء من مواد التحضيري للمسار الانساني

حيث انه في الاختبارات النهائية مادتان فقط يتم الاختبار فيها وهي مادة الحاسب والانجليزي اما بقية المواد فهو تقويم مستمر والاختبارات القصيرة...

اما بالنسبة لدوام الطالبات فهو من الساعة 7:30 الى الساعة 1:30 هذا فقط اذا كان عدد المحاضرات ثلاث محاضرات

اما بالنسبة لبقيت الايام فوقت الخروج يكون الساعة 12:30

ويكون وقت البريك من الساعة 9:15 الى 9:30

والجدول في السنة التحضيري يوجد به يوم واحد من يوم الاسبوع اوف اي ان الدوام يكون لاربع ايام فقط

اما بالنسبة للتخصصات فهو قبل الاختبارات النهائية تقوم كل طالبة بتسجيل رغباتها في التخصصات وبعد الانتهاء من الاختبارات تظهر نتائج التخصصات ويتم قبول الطالبه برغباتها على حسب المعدل واعلى تخصص يطلب معدل في المسار الانساني هو التربية الخاصة حيث انه يتطلب معدل اعلى من 4,65 .

وفي النهاية اتمنى لكن التوفيق واتمنى بأن تكون معلوماتي كافية لافادتكن فان اخطئت اعذروني وان اصبت فهذا مرادي ....

 

مسار عام - جامعة الأميرة نورة - تجربة نورة

خطوة التحضيرية

 

 

السلام عليكم

"معكم نورة طالبة في جامعة الأميرة نورة بنت عبد الرحمن

تحضيري مسار عام "

اولاَ:راح اتكلم لكم اول شيء عن الجداول اذا نزلت انا صارت معي مشكلة وهي ان
 جدولي فيه رموز مو مفهومة وماكنت عارفة ايش اسوي وهل اداوم اول يوم ولا لا مع ان فيه بنات كثير نزلت جداولهم بس داومت وكانوا الجامعة مسوين لقاء تعريفي يعني اي وحدة عندها استفسار او سؤال عن شيء راح يتكلمون لكم المسؤولات عن البرنامج وراح يوضحون لكم كل شيء يعني مايحتاج تخافون او تتوترون لأن اللقاء التعريفي راح يفهمكم كل شيء

 ثانيا: الدوام طبعا تعرفون فيه دوام صباحي الي هو من الساعة ثمنية وفيه الدوام

 المسائي الي يبدأ الساعة ١٢ ونص وفيه ايام دوام كامل من ٨ الى ٤ طبعاً هذا على حسب الجدول

ثالثاً المواد:طبعاً تغير النظام للمواد على حسب التخصص يعني مو زي دراستنا..

رابعاً : النشاطات والنادي

النشاطات والمشاريع كثيرة مرة وحلوة كل يوم تقريبا فيه دورات بشهادات حضور

ومشاريع حلوة للكليات اما بالنسبة للنادي فهو اشتراك شهري بقيمة ١٠٠ ريال وبالنسبة

للملابس عادي اي شيء بس مايكون شفاف وقصير..

خامسا: هذا حساب وحدة جزاها الله خير تساعد البنات في كل شيء وكانت تعلمنا بكل شيء يصير ضيفوها راح تساعدكم كثير (pnu91) . 

 

أتمنى تكونون أستفدتوا من تجربتي حاولت أوصلكم الأشياء المهمة اللي ممكن تفيدكم

 

وفقكم الله جميعاً ..

 

أختكم نورة.

 

 

 

 

 

المسار الصحي - جامعة الأميرة نورة - تجربة الجوهرة

خطوة التحضيرية

 

السلام عليكم ورحمة الله وبركاته..

اولاً اعرفكم بنفسي .. اسمي الجوهرة وبتكلم لكم عن تجربتي بالسنة التأسيسية للكليات الصحية بجامعة الاميرة نورة بنت عبدالرحمن  و ان شاء الله اقدر افيدكم ♥

*حطوا في بالكم ان ممكن تكون فيه بعض التغييرات لدفعتكم

قبل كل شيء لازم تعرفون أنفسكم وتحددون رغباتكم وترسمون لكم خطة واضحه من البداية لتحقيق حلمكم واقتنعوا ان النجاح لله ثم لأنفسكم , واسألوا ربكم دائماً ان يكتب لكم الخير ويرزقكم الرضا ☼...

 بسم الله وبأتكلم عن اهم الأشياء تقريبا وهي :

v      اختبار تحديد المستوى للغة الإنجليزية

v      اصدار البطاقة الجامعية

v      اللقاء التعريفي

v      المقررات المتطلبة بالسنة التأسيسية

 

اولاً اختبار تحديد المستوى للغة الإنجليزية : اذا طلع قبولكم في المسار الصحي بجامعة الاميرة نورة بيعطونكم موعد للاختبار وماراح يكون فيه مقابله شخصية فقط اختبار لتحديد المستوى طبعاً مهم جداً حضورك .

الاختبار يحدد مستواك باللغة الإنجليزية وهو عبارة عن ثلاثة مستويات

Level 1ضعيف) ), Level 2(متوسط) , Level 3 (عالي )

 والغرض منه فقط تحديد الطريقة التي يتعامل بها الأساتذة مع الطالبات وتطويرهم , ما يدخل ابداً في تحديد تخصصك. الاختبار ورقي وكله اختياري

 

نجي لثاني شيء وهو اصدار البطاقة الجامعية: ما راح تكون بنفس يوم تحديد المستوى بتكون بيوم لحالها ,بيعلمونكم بموعد اصدار البطاقة و بـتصورين و تأخذينها بوقتها .

 

ثالثاً اللقاء التعريفي: بيكون ان شاء الله بأول أسبوع دوام لكم  بيعطونكم نبذة عن السنه التأسيسية  و بيكون فيه انشطه ممتعة للغة الإنجليزية ويعطونكم عليها شهادات , وبياخذونكم للمكتبة المركزية بتستمتعون كثيير ان شاء الله .

واخيراً المواد الي بتدرسونها بالسنة التأسيسية :

الترم الأول 6 مواد : ( انجل – ريض – حيا– كيم –  سلم - مصطلحات طبية )  

·         انجل (اللغة الإنجليزية)

كل يوم بيصير عندكم كلاس اما صباحي (8-10:30 ) او مسائي (12:30-3)

الماده عليها 6 ساعات من المعدل وجداً سهله , راح تكون ملزمة وحدة تشترونها من مكتبة الجامعة و

المريح ان كل الي معاك بالكلاس راح يكونون بنفس مستواك.. هذي فرصتكم تستغلون هذا الوقت وتطورون لغتكم لان التدريس لكل المواد راح يكون باللغة الإنجليزية واغلب الي بيدرسونكم أجانب  فـ مهم تطورين من نفسك .

 

·         ريض (الرياضيات )

راح يكون عندكم كلاسين بالأسبوع ( نظري وعملي )

بالكلاس النظري راح تاخذون المحاضرة وكلاس العملي تطبقون وتحلون المسائل

راح تقولكم الاستاذه عن الكتاب ومن وين تجيبونه , بالنسبه لي ماكان مهم لان كانت استاذتي وهي  تشرح تكتب العنوان والاشياء المهمه والسؤال  والحل على السبورة , وكنا نجيب دفتر كبير ونكتب معاها واذا جا الاختبار نذاكر من الدفتر فقط , بالنسبة لي هذي الطريقة مفيدة تخليك تكتبين كل شي وتساعدك على الفهم بس المشكلة كانت بالوقت .. لازم تكونين سريعة بالكتابة , المادة بشكل عام سهلة وكلها اخذناها بالثانوي الفرق ان الشرح بيكون باللغة الإنجليزية والمحاضرات كثيره نوعا ما فالأفضل انك تراجعين اول بأول عشان ما يصعب عليك شيء .

 

·         حيا ( الاحياء )

الاحياء والمواد العلمية بشكل عام بتكون مقسمة لـ نظري وعملي

الجزء النظري تاخذونه بالكلاس والعملي بالمعمل , غالبا استاذه النظري غير عن استاذه العملي

وبالنسبة للكتب بتكون محاضرات ترسلها لكم التيتشر وتطبعونها .

الجزء النظري كثيير ويبيله تركيز ومذاكرة اول بأول , تتكلم الفصول الأولى عن : الخلايا بشكل عام و الخلايا الحيوانية والنباتية ومكوناتها , والجزيئات العضوية والغير عضوية ...  اغلبها ماخذينها بالثانوي بس مثل ما قلت الفرق انه باللغة الإنجليزية . اما العملي فهو اكيد مرتبط بالنظري لكن اخف و راح تسوون تجارب, المعامل بشكل عام ممتعة !

 

·         كيم ( كيمياء )

المادة سهلة ومقسمة لعملي ونظري , المحاضرات بترسلها لكم الاستاذه وتطبعونها , الفصول الأولى تتكلم عن الجدول الدوري والروابط الكيميائية والاحماض والقواعد ... والفصل الاخير كان عن الكيمياء العضوية وكلها اشياء اخذتوها بالثانوي يعني لا تشيلون هم تتسهل ان شاء الله والعملي يكون فيه تجارب وتطبيق للي اخذتوه بالنظري .

 

·         سلم ( الثقافة الإسلامية 1)

ماده حلوه وسهلة وهو مقرر كل الجامعة تدرسه وراح تدرسينه لين تتخرجين وهو أجزاء تاخذين بالترم الأول (سلم 1) يتكلم عن المرأة بالإسلام وحقوقها  بعدين الترم الثاني سلم(2) 3 وهكذا..

 

·         (مصطلحات طبية )

المادة الوحيدة الجديدة عليكم , المصطلحات الطبية هي لغة تستخدم للوصف الدقيق للجسم البشري والمكونات المرافقة والأوضاع .. وهي لغة لها قواعد وتهجئة وطريقة لفظ خاصه فيها مثل أي لغة أخرى.

 راح تتعلمون كيف تكتبون مصطلح طبي و راح تأخذون المصطلحات الطبية لأجهزة الجسم والامراض..

المادة حلوة واغلبها حفظ .

 

الترم الثاني .. سبعة مواد : ( انجل – فيز – حيا – عرض – سلم2 – عرب – مهن )

 

·         انجل ( اللغة الإنجليزية )

نفس الترم الأول الفرق اذا كنتِ صباحي الترم الأول راح تكونين مسائي

 

·         فيز ( فيزياء )

المادة مقسمة لنظري وعملي ومافي كتب تشترينها فقط محاضرات ترسلها الاستاذه على ايميل شعبتكم وتطبعونها  , المادة بالفصول الأولى تتكلم عن قوانين نيوتن ومبدأ ارخميدس والحرارة والمرايا والعدسات ... هذي بعض المواضيع الي اتذكرها , وكلها تقريباً إعادة للي اخذتوه بالثانوي  .

 

·         حيا (احياء )

راح يكون نفس نظام الترم الأول نظري وعملي كلاسين بالأسبوع لكن في هذا السمستر  بتأخذون  عن جسم الانسان وكل فصل يتكلم عن جهاز من أجهزة الجسم , مراح أقولكم صعب لكن لازم تشدوا حيلكم فيه مصطلحات كثيرة بتكون جديدة عليكم واكيد مع المذاكرة المستمرة كل شيء بيتسهل ☼

 

·         عرض ( إحصاء )

المادة لها جزء عملي وجزء نظري ومو صعبة لكن تحتاج تركيز , الفصول الأولى تتكلم عن المتوسط الحسابي والوسيط والاحتمالات والعينة العشوائية .

 

·         سلم (الثقافة الإسلامية 2)

راح يتكلم عن الخطبة والزواج واحكامها و العائله وحقوق الأبناء وحقوق الوالدين ومواضيع جداً مفيدة واغلب الكلاس يكون مناقشات بالموضوعات يعني مراح تملون ان شاء الله

 

·         عرب1 ( اللغة العربية )

المادة سهلة وهي أيضا مقرر كل الجامعة تدرسه ونظامه نفس الثقافة الاسلامية يكون أجزاء , عرب1 يتكلم عن النحو وهمزة الوصل والقطع وكيف تكتبون رسالة و مقال وتكون كلاس واحد بالأسبوع .

 

·         مهن ( health profession  introduction to)

المادة جداً سهلة وممتعة تتكلم بشكل عام عن اخلاقيات المهنة وعن التخصصات الطبية وفيها دورات مثل الاسعافات أولية وفيها مشاريع كثيره منها ان انتِ ومجموعتك تختارون يوم عالمي لمرض معين مثلا:(اليوم  لعالمي للزهايمر او متلازمة داون ...) والي عليك توعين الناس عن المرض وتقيمك استاذتك عليه . 

 

و الحمد لله بكذا اكون خلصت ☼

 أتمنى  ان أكون افدتكم ولو بقليل  واعذروني اذا كان فيه تقصير

وفقني الله وإياكم لما فيه صالحنا جميعاً ..

 

 

المسار الصحي - جامعة الملك سعود- تجربة هلا

 

خطوة التحضيرية"

 

تجربة  الطالبة هلا  - مسار صحي - جامعة الملك سعود"

 

السلام عليكم ورحمه الله وبركاته 

مبروك لكم جميعاً القبول ، الله يجعلها سنه خير وتوفيق عليكم

وأهلاً وسهلاً بكم في جامعه الملك سعود ، بعد جد واجتهاد ١٢ سنه أنتم الآن في اول خطوات تحقيق حلمكم ولله الفضل والمنه "

أنا هلا ، بتكلم لكم عن المسار الصحي في جامعه الملك سعود 

أول شيء بتدرسون السنه التحضيريه في عليشه و إذا تخصصتم بإذن الله بتروحون الدرعيه . هالشيء حلو لإن كل الي بعليشه تحضيري فيمديكم سنه تتعودون على الجامعه ونظامها .. 

إذا طلع قبولكم في المسار الصحي بجامعه الملك سعود بيعطونكم موعد للمقابله  طبعاً مهم جداً تحضرون المقابله وشرط أساسي للقبول ، لذلك أنتبهوا يروح عليكم الموعد .

المقابله بالعربي ومكانها في جامعه الملك سعود بالدرعيه ، في الاول بتعبون ورقه فيه اساميكم ورغباتكم في التخصصات ، لكن التخصصات الي بتكتبونه فقط عشان يناقشونكم عليها وليست الي بيخصصونكم بناءً عليها ، ثم يسألونكِ أسئله شخصيه بسيطه مثل ليش دخلتِ صحي ، هل لكِ اقارب في المسار الصحي ، من قدوتكِ وليش ؟ تحبين العمل الجماعي ، كيف ممكن توفقين بين عملك واسرتك في المستقبل ، هل دخلتِ الصحي بناءً على رغبتك او رغبه اهلكِ ، هل أهلك شجعوك تدخلين هالمسار ... وهكذا -نادراً أحد يرفض بعد المقابله - إطمئنوا

* ارفقت لكم صوره عن الأسئله الي ممكن تجي بالمقابله . 

بعد ماتنتهي جميع المقابلات ومدتها اسبوع تقريباً يعلنون نتائج القبول ،

إلي ماتم قبولهم بتنفتح لهم الرغبات و ينقبلون في المسارات العلميه او الانسانيه حسب ترتيب رغباتهم . 

قبل تبدأ الدوامات بيسوون لكم يوم تعريفي تختارون الموعد الي يناسبكم ، في هاليوم بيعرفونكم على الجامعه وبعض الانظمه والقوانين و بيسوون لكم البطاقه الجامعيه و اختبار تحديد مستوى اللغه الانجليزيه ، مايحتاج تذاكرون له لأن هو فقط يقيس مستواك عشان تُدرسين حسب المستوى إلي يناسبكِ .. تنقسم المستويات لثلاث مستويات:

 A -ضعيف (ساعات الغياب ٧٥)

B-متوسط (ساعات الغياب ٥٧)

C-عالي (عندهم يوم أوف بالترم الأول) 

بالنسبه للمواد بتدرسون الترم الاول : 

نجم - تقن - ريض- علم 

النجم ( الانجلش ) :

فرصتكم في السنه التحضيريه تطورون اللغه الانجليزيه وبالأخص الترم الأول فحاولوا تستغلونه

الاختبار كان موحد السنوات الي قبل والترم الاول لنا ، لكن بالترم الثاني خلو لكل مستوى اختبار

كل يوم تقريباً بيصير عندكم كلاسين انقلش اما صباحي او مسائي من ساعتين إلى اربع ساعات باليوم حسب مستواكِ ، وتنقسم لكلاسين بينهم بريك ربع ساعه تقريباً بالكلاس الاول بتدرسكم تيتشر مثلا الفوكاب والسبيكنق والكلاس الثاني تيتشر ثانيه تدرسكم القرامر والرايتينق .. 

أغلب إلي بيدرسونكم أجانب ، حاولوا تستفيدون منهم قد ما تقدرون وبما ان اغلب الي في كلاسك نفس مستواك فبتحسين الوضع طبيعي لاتستحين تكلمي معهم وحاولي استغلي هالوقت عشان تطورين من لغتكِ لإن عليه ثمانيه ساعات بالمعدل وجداً سهل تجيبون A+ فيه إذا اجتهدتم وتعبتم على نفسكم ، فيه مواقع كثير مفيده سواءً باليوتيوب او مواقع الجامعه او البرامج .. 

مذاكرته من الليست إلي يعطونكم اياها شامله ، انا كنت ارجع للكتاب عشان شرح القرامرز وبالترم الثاني عشان تمارين الفوكاب و كان فيه تطبيق تابع للمصطلحات الطبيه فيه تمارين عليها جداً مفيد تحصلون اسمه والباسورد بأول صفحه بالكتاب

الترم الاول بتدرسون اربع كتب تركز اكثر شيء على القواعد والكلمات ، الترم الثاني بتدرسون خمس كتب تركز على القراءه والاستماع + كتاب مصطلحات طبيه

تقسيم الدرجات بيكون على الميد والفاينل محوسب وكله اختياري  + اختبار رايتينق للفاينل + اختبار سبيكنق 

بالنسبه للميد والفانيل المحوسب ينقسم ل أربع اقسام 

*كلمات 

*قواعد

*قراءه 

*استماع 

الاختبار ٦٠ فقره وكل فقره عليها نص . 

بالنسبه للرايتينق بيحددون لكم عدد كلمات معين ، لازم ماتكتبون اقل منه ، أنا قبل الاختبار بشهر تقريباًكنت كل يوم اكتب عن موضوع واعطيه التيتشر تصححه ، جداً متعاونات كانوا بالترم الاول جابوا لنا نتكلم عن أفضل فصول السنه ، والترم الثاني عن الجامعه والسنه التحضيريه .. 

أما السبيكنق في البدايه يسألونكم أسئله شخصيه بعدين محادثه مع صديقتكِ وجداً سهل بس تدربوا عليه وشوفوا باليوتيوب . 

 التقن ( الحاسب الآلي) : ماده جميله بس انتبهوا ماتعطونها حقها بتدرسونها باللغه الانجليزية وإلي بيدرسونكم اغبلهم هنديات وجداً لطيفات ومتعاونات هالماده نفس الحاسب ألي درسناه بالثانوي بس أبسط بالبدايه بتاخذون تاريخ الحاسب و انواع الحواسيب والفايروسات والاقراص المرنه وما إلى ذلك ... وبتختبرون في الميد اربع فصول وبالفاينل تختبرون بباقي الكتاب الجميل ان الي اختبرتوه بالميد ينحذف خلاص معد ترجعون تختبرونه .. 

المصدر الاساسي للمذاكره الكتاب ، بيحددون معكم الاستاذات لكن لاتعتمدون على تحديدهم لإن تجي اسئله خارج التحديد ، هم يحددون لكم الأسئله إلي تتكرر واجد لكنهم مايعرفون عن أسئله الاختبار ، و ينزلون لكم اسئله بموقع اسمه سكروتيف كثير اسئله تجي منه  ، بيعلمونكم عليه بوقتها +فيه موقع اسمه ايرا تابع للجامعه جداً جميل ومفيد مهم جداً تتدربون فيه قبل الاختبار واغلب -العملي -بالميد نفس فكره الي بالموقع ، الفاينل ماجابوا نفس الي بالموقع الا كم سؤال ف لازم تذاكرون الكتاب بعدين تتدربون ب إيرا .. بتدرسون البوربوينت والورد والاكسل والانترنت بالفاينل ، وفيه مشروع للماده يعطونكم ثلاث مواضيع وتختارون موضوع واحد وتشتغلون عليه بوقت الكلاس ، ب ايرا بتحصلون الكتاب مترجم انا كنت افتح الموقع واترجم كتابي اول بأول عشان يسهل علي الحفظ والمذاكره وقت الاختبار ، تقدرون تشترون الكتاب مترجم من الجامعه لكن الافضل انتم تترجمون لان الكلمات تتكرر كثير ف إذا ترجمتم اول ٣ فصول مابتحتاجون تترجمون الباقي الا كم كلمه  .. سهل تجيبون A+ بهالماده اذا عطيتوها حقها ، في البدايه يمكن ماتفهمون على لكنّه التيتشر لكن بسرعه بتتعودون وتمشون فيه .

بالنسبه للعلم (مهارات الإتصال) : أخف و أسهل ماده بالتحضيري ✔ 

من اسمها تتكلم عن التواصل مع الآخرين ، المرسل والمستقبل ، الشخصيات وفيها جزء بسيط من علم النفس ... ساعاتها بالمعدل ٢ . تدرسونها مرتين بالاسبوع ساعتين محاظره وساعه تمارين . 

الدرجات موزعه على : كويزات ، مشاركه ، ميد ، مشروع ، فاينل . 

المشروع أما يكون عمل تطوعي داخلي-بالجامعه- أو خارجي ، فلم وثائقي ، تغطيه فعاليه . كل مجموعه تختار المشروع إلي حابينه بعدين تعبون عليه تقرير بسيط بتعطيكم اياه الاستاذه .. 

المصدر الاساسي للمذاكره الكتاب ، الأسئله جداً واضحه وكلها اختياري وصح وخطأ ، تقدرون تشوفون نماذج سابقه له لو حبيتم تعرفون الطريقه ، وفيه بموقع التعلم الذاتي LMSالتابع للجامعه أسئله لو حبيتم تتدربون . 

هالماده جداً سهل تجيبون فيها A+ بس لاتهملون فيها .

 

الريض (الرياضيات) : اعاده لمواضيع الثانوي  بس فيه كم فكره جديده ، فيه دكتور اسمه نضال يشرح المنهج في البلاك بورد جداً ممتاز ، هو الاختبار الوحيد بالجامعه المقالي  باقي الاختبارات كلها اختياري .. ماله مشروع بس فيه كويز. اسبوع كويز واسبوع واجب حاولوا تضمنون درجه الكويز وماتنقصون فيه لانه سهل الاختبار بالانجلش لكن الشرح يكون بالعربي . جداً سهله المصطلحات ومكرره وبسرعه بتتعودون عليها . فيه ملازم أسئله سابقه وحلول لبعض أسئله الكتاب الداخله بالخطه بمكتبه المهندس و كوبي كوم . بأول محاظره بيعطونكم الخطه ، والتمارين إلي فيها هي فقط الي داخله معكم أنا اول ما اخذت الخطه حددت الامثله  التمارين  الي معنا بهايلايت عشان تكون واضحه عندي وقت المذاكره . 

ساعاتها بالمعدل ٢ وتدرسونها مرتين بالاسبوع ساعتين شرح وساعه تمارين . 

لا تخلونها تتراكم عليكم وحاولوا تفهمونها اول بأول . 

*الاستاذات لهم ساعات مكتبيه بيعلمونكم عليها ، اذا مافهمتِ  شيء تقدرين تروحين لها وتشرحه لكِ + غرفه المصادر فيها استاذه تشرح الرياضيات تقدرين تروحين لها لو ماحصلتِ استاذتكِ  ✔

هذا بالنسبه للسمستر الأول .

 

 

 

الترم الثاني هالترم حاولوا تذاكرون أول بأول خاصةً بأول ثلاث اسابيع عشان تتعودون على المصطلحات وتضمنون درجه الميد الاول . طبعاً الترم الثاني مافيه مشاريع لذلك الدرجات بتكون مقسمه على ميد ١ و ميد ٢ وفاينل وعملي اذا فيه . 

بإستثناء الانقلش اختبار واحد نفس السمستر الاول . 

بتدرسون خمس مواد : 

نجم - انجلش 

حين - أحياء 

فيز-فيزياء 

كيم-كيمياء 

احص-إحصاء 

 

* النجم نفس الترم الاول لكن بتدرسون مصطلحات طبيه وبيكون مركز على مهارات القراءه والاستماع اكثر . 

 

الأحياء : عليه بالمعدل ثلاث ساعات . 

عندكم بالأسبوع كلاسين ، واحد نظري وواحد عملي . 

المنهج والإختبار بالإنجلش لكن الشرح بالعربي . 

اختبار النظري إختياري وصح وخطأ . بتدرسون التنفس والإنقسام والأمراض و الخلايا وما إلى ذلك .. مواضيعه جميله لكن يحتاج له مذاكره أول بأول أنتبهوا يتراكم عليكم لإنه دسم شوي لكن سهل بإذن الله تجيبون A+ 

 فيه دكتور بالبلاك بورد اسمه د.أشرف يشرح لكم الماده بشكل جداً جميل وواضح وفيه بعد كل محاظره أسئله بالموقع تقدرون تستفيدون وتحلونها . 

شوفوا أسئله سابقه للأحياء خاصةً بالفاينل كثير يتكرر منها.

 

*مصدر المذاكره : السلايد ، بينزلونها لكم بموقع الجامعه تقدرون تطبعونها او  تشترونها من مكتبه المهندس او كوبي كوم بتحصلونها أما ملونه انجلش فقط ، او ابيض واسود لكن مترجمه . انتبهوا تاخذون نسخه قديمه . 

 

أما العملي اختباره فيه رسم و مقالي بس بسيط وممتع جداً . العملي ينقسم لجزئين بالبدايه بتاخذون مجاهر وتتعرفون على الخلايا تحت المجهر ثم ترسمونها عقبها بتختبرون فيها ومعد ترجعون لها ,الجزء الثاني فصائل الدم والتشريح ، وهو أبسط وأقصر من الأول  بتتعرفون على فصائل الدم بعدها تشرحون جرذي وتتعرفون على أعضاءه . 

(المعلمات جداً جداً جداً متعاونات وبتحبون الماده ) 

الأحصاء : 

تختلف شوي عن الرياضيات هالماده مهم جداً جداً تحلون أسئله سابقه قبل الاختبار وبالأخص الفاينل . ذاكروا لها زين ولا تتهاونون فيها لأن أحيانا يلعبون بطريقه الأسئله لكن يمديكم تجيبون فيها A+ بإذن الله .

ساعاتها في المعدل ٢ . وتاخذون كلاس واحد بالأسبوع . 

إلي تختبرونه بميد ١و٢  مايدخل بالفاينل 

الشرح بيكون عربي بس الاختبار والمنهج انجلش . 

الأختبار كله اختياري وعلى كل فقره درجه .

مصدر المذاكره : ملزمه الشيحه بتحصلونها بالمطبعه إلي بالبهو أو تطبعونها من الموقع . 

 

 

الفيزياء : 

*النظري

تقريباً نفس فيزياء الثانوي بتاخذون الحركه والمتجهات و والعدسات والمرايا ونيوتن والشغل والقوه والاحتكاك و الفيزياء النوويه بالنهايه .. 

مهم جداً تتدربون في هالماده فيه مصدرين للمذاكره كلهم نفس الشيء تقريباً لكن اختاروا الانسب لكم إما الضياء او الشمري 

بتحصلونهم بمكتبه المهندس او كوبي كوم . 

انا اعتمدت الضياء لإن أسئلته كثيرة وكنت محمله الشمري pdf و اشوف الشرح منه . فيه مواقع كثير تشرحه باليوتيوب بس اكتبوا اسم الشابتر ويطلع لكم . وفيه قناه باليوتيوب اسمها اكاديمي خان يشرح كل المواد فيه بنات كانوا يستخدمونه .. 
الضياء : يكتب بخط اليد .. أما الشمري - طباعة- يعني اوضح وارتب .

كثثثير تكررت أسئله من الضياء والشمري تقريباً بالميد الثاني جاء لنا خمس أسئله بالضبط نفس الضياء مع تغيير الارقام . 

إفهموا إفهموا إفهموا مهم جداً كل فقره بالضياء تكونون فاهمينها واذا مافهمتم ارجعوا للدكتوره او بنات شعبتكم وأسئلوهم . 

بعد كل شابتر ارجعوا وحلوا عشان يثبت وماتتراكم عليكم وقت الاختبار . 

الماده والاختبار بالانجلش لكن يدرسونكم عربيات والمصطلحات سهله وتتكرر كثير . 

لها ثلاث ساعات بالمعدل . 

وتاخذون كلاس نظري وكلاس عملي يعني كلاسين بالاسبوع . 

بالنسبه *للعملي 

فهو جداً سهل ويمديكم تجيبون فيه فل مارك 

تطبيق على بعض التجارب للقوانين الي بالنظري و رسم بياني . 

اشتروا الملزمه من التصوير الي بالبهو كافيه ووافيه . 

وينقسم اختباره لاختبارين 

نظري : اسئله على التجربه صح وخطأ واختياري 

وعملي : تطبقون التجربه 

المعلمات جداً متعاونات وبيساعدونكم . 

 

 

آخر ماده هي الكيمياء : وزنها بالمعدل ساعتين إذا فهمتم البدايه بيسهل عليكم الباقي . الاختبار سهل لكن يبي له ترررركييييز و تعويد يد على الحل بسرعه . السلايد مصدر اساسي للمذاكره . لكن مهم جداً تتدربون على أسئله سابقه عشان تشوفون الأفكار . فيه ملزمه بكوبي كوم والمهندس فيها أسئله بعد كل شابتر تدرسونه حلوا حلوا حلوا والي تغلطون فيه ارجعوا للدكتوره تشرحه لكم . 

في البدايه بتدرسون الالكان والالكين والالكاين بعدين بتدرسون الايثر والكحول والبنزين والكيتونات وغيرها  ...

فيه باليوتيوب استاذ يشرح بعض التفاعلات والخصائص الكيميائيه جداً فادني اسمه أ.معاذ الشلال . وفيه ملزمه شرح مفيده جداً لكن فيها بعض الاخطاء ل سيد عرفات وتحصلونها بالمهندس او كوبي كوم . 

 

 

في النهايه حابه اقولكم: 

( ولا تقنطوا من رحمه الله ) بتمرون بلحظات طفش او ضعف او نقص لكنها ليست النهايه هي فقط بدايه البدايه ، البدايه الجميله لمستقبلكم المزهر سنه واحده من الجد والاجتهاد تُحقق حلم سعيتم لأجله  اثنى عشر سنه ! . بتكتبون التحضيريه في سيره نجاحكم و هالتعب والجد والمثابره كلها لن تحصل إلا بعون من الله وتوفيقه فأسئلوه التوفيق دائماً وأبداً و لاتقارنون نفسكم بغيركم مطلقاً . كونوا روحاً للتفاؤل ومثالاً للأصرار والعزيمه وانتبهوا تحطمون نفسكم أو تخلون ماده تهزمكم أو تحبطكم أنتم اجتزتم الكثير وقادرين بعون الله وكرمه على اجتياز ماتبقى بأفضل الدرجات ✔

أختكم هلا

http://ask.fm/halafisal