السلام
عليكم ورحمة الله وبركاته ..
أهلا بالجامعية المستجدة
إن شاء الله في هذه التدوينة بتحصلين على كل الأسئلة اللي تدور بالك من أول
ماانتهيتي من ثالث ثانوي .. او ممكن من اول مادخلتي الثانوي, بتحصلين أيضا تجارب
بنات توهم انتهوا من السنة التحضيرية يعني تجربة قريبة مب قبل سنتين او ثلاث !
يعني تجارب طازجة
تذكري أنني أنا السنة للي
مضت كنت نفس شعورك الآن مادري بأي جامعة بصير مادري مين من صديقاتي بتكون معي
مادري ايش هو نظام الجامعة للي بنقبل فيها حتى لو عندي معلومات معلوماتي هذه ممكن
صحيحه ممكن لا فالتجربة فعلا خير برهان .. فتحت هالمدونة لاني فعلا كنت ادور مدونة
او موضوع شامل لكل الجامعات ولكل المسارات والى اخره.. صحيح القاها لكن تكون قبل
ثلاث سنوات او اربع! لذلك حبيت أنقل تجربتي وتجربة صحبات لي من جامعات مختلفة
بالرياض انتهوا للتو من السنة التحضيرية دفعة عام 1436-1437 أتمنى أنها تكون
إجابة لتساؤلات كثيرة ببالك عزيزتي القارئة.
أول ماتفتح بوابة القبول
الموحد ترتبين رغباتك وعلى أساس ترتيبك لها معدلك التراكمي وشطارة دفعتك هي من بعد الله تحدد وين بتكونين بأي جامعة وبأي مسار.
رابط بوابة القبول الموحد
بسم
الله نبدأ جولتنا ..
1-
جامعة
الملك سعود بن عبدالعزيز
2-
جامعة
الملك سعود بن عبدالعزيز الحرس
3-
جامعة
الإمام محمد بن سعود
4-
جامعة
الأميرة نورة بنت عبدالرحمن
طرحت في
مدونتي تجربة او تجربتين من واقع طالبة
تحضيرية مرت بكل التساؤلات اللي ودك تعرفينها لادخلتي الجامعة -بإذن الله- ومن
مختلف المسارات والجامعات الحكومية
بالرياض.
بداية راح أخذكم إلى جامعة
الملك سعود بن عبدالعزيز - مقر الدراسات السنة التحضيرية بعليشة –
جامعة الملك سعود .. تحتوي على ثلاث مسارات وهي /
المسار الأول : المسار
الصحي - لطالبات العلمي فقط -
المسار الثاني : المسار
العلمي – لطالبات العلمي فقط -
المسار الثالث : المسار
الإنساني – لطالبات العلمي والأدبي -
السنة التحضيرية بجامعة الملك سعود عبارة عن سنة
دراسية كاملة مقسمة إلى ترمين .,
تختلف طبيعة المواد باختلاف المسار اللهم كم
مادة مشتركة بين هالثلاث مسارات .
راح أبدأ أتكلم عن اللقاء التعريفي وش راح يكون فيه :
اللقاء التعريفي/ تروحين الجامعة (عليشة)
وتخلصين أربع اشياء .
-
اول
شي يعطونكم نبذة عن السنة التحضيرية
-
اختبار
تحديد مستوى للغة الانجليزية
-
تصوير
لبطاقة الجامعة وتاخذينها بوقتها
-
والمفروض
تاخذين بطاقة البنك لكن حنا اخذناها اول اسبوع دوام بعد ماعلنوا عن المكان اللي
راح يكونون متواجدين فيه.
أكمل راح تجتمعون بعد اللقاء ويودونكم ممر فيه كلاسات و فيها
أجهزة كمبيوتر تدخلين الكلاس وتبدين
اختبار .
الإختبار اختياري وراح يكون فيها مقاطع سماعية وتجاوبين عليها .
لاتخافين أبد يعني حتى مايحتاج مذكرة ولا عليه درجات ولا شيء
بس وظيفة الاختبار هذا يحددك أنتي أي مستوى A
,B or C يعني البنات اللي بيكونون معك نفس مستواك .
A/ المستوى الإبتدائي
B/ المستوى المتوسط
C/ المستوى المرتفع
بنتكلم بشكل مفصل في
مادة الأنقليزي تحت -بإذن الله- عند فقرة المواد
المباني والمطاعم/
نجي للمباني والمطعم , كانت هاجس بالنسبة لي هههه كنت متوقعه
ان الجامعة قديمة وخرابة لكن ابدا بالعكس ,
فيه مبنين للسنة التحضيرية واحد للعلمي والصحي (1) وواحد للانساني (2) . كبيرات تقريبا ومتطورات الى حد ما وفيهم كوفيات صحيح مو ذاك
الزود لكن عادي تمشي الحال , فيه د.كيف وفيه أجهزة فيها تشوكلت وأجهزة مشروبات
ساخنة .
فيه مبنى (3) أبعد شوي وأقدم هذا المبنى لمادة الحاسب فقط وأهم شي واتوقع
كلكم عارفينة الطبيعه والأشجار اللي تتميز فيها عليشه , بتنبسطون بالشتاء والامطار
مرره !
وفي مكتبة وفي سوق الطالبات –سوبرماركت مصغر- يعني كل شيء
حولكم متوفر بس يبيلك مشي والله ,اخذيها من باب الرياضة يعني!
نجي للجدول راح ينزل لكم متأخر يوم السبت بالليل قبل أول يوم دوام منها راح تعرفين هل جدولك
مسائي أو صباحي .
طبعا كلهم الدوام من 7:30 الى 3 مافيه دوام بعد كذا بس اللي يفرق متى تبدين
كلاساتك ومتى تنتهين !
إذا كان انقلش أول المواد معناته جدولك صباحي يعني كل يوم راح
تجين الصباح الساعة 7:30 تبدين كلاسين الانقلش الى 11 تقريبا يفرق من مستوى لمستوى
وراح يكون فيه بينهم بريك تقريبا نص ساعة . الكلاس الأول يختلف عن تيتشر الكلاس
الثاني وبتجارب البنات راح تفهمون أكثر كيفية الطريقة.
وراح يكمل دوامك بباقي
المواد الى 3 , فيه أيام تطلعين بدري , وايام لا بيكون فيه بريكات طويله .
أما اذا كان انقلش اخر شي
الظهر فهذا يعني ان جدولك مسائي
يعنى الصباح كل يوم راح يكون عندك مواد مختلفه والانقلش يوميا راح يبدا الكلاسين
تقريبا من 11:25 الى 2:40 وبينهم بريك ساعة الا ثلث وزي ماقلت يفرق من مستوى
لمستوى ونفس الشيء تيتشر الكلاس الاول تختلف عن تيتشر الكلاس الثاني .
أول يوم دراسي في تحضيرية الملك سعود/
نجي لأول يوم واستلام
الكتب , بعد مايطلع جدولك وتداومين وتروحين كلاسك بيجون ياخذونكم المعلمات يودونكم
مكان تاخذون الكتب يعني مايحتاج تتعبين نفسك وتدورين المكان , قيمتهم تقريبا من
200-190 فقط لان الجامعة تدفع 75% من قيمة الكتب .
تجارب الطالبات في جامعة الملك سعود بمختلف المسارات ..في الجهة اليمنى من المدونة .
ليست هناك تعليقات:
إرسال تعليق